Tob 13

1 И Товит написа молитву в радость и рече: благословен Бог живый во веки и царство Его, 2 зане Он наказует и милует, низводит во ад и возводит, и несть иже избежит руки Его: 3 исповедайтеся Ему, сынове Израилевы, пред языки, зане Той разсея нас в них, 4 тамо являйте величие Его, возносите Его пред всяким живущим, яко Той Господь наш и Бог, Той Отец наш во вся веки, 5 и наказовати имать нас в неправдах наших, и паки помилует и соберет ны от всех языков, идеже аще расточени будете в них: 6 аще обратитеся к Нему всем сердцем вашим и всею душею вашею творити пред Ним истину, тогда обратится к вам и не скрыет лица Своего от вас, и узрите, яже сотворит с вами: и исповедайтеся Ему всеми усты вашими, и благословите Господа правды и возносите Царя веков: аз в земли пленения моего исповедаюся Ему и сказую крепость и величие Его языку грешников: обратитеся, грешницы, и творите правду пред Ним: кто весть, аще благоволит о вас и сотворит милость вам? 7 Бога моего возношу, и душа моя Царя Небеснаго, и возвеселится о величии Его: 8 да возглаголют вси и да исповедятся Ему во Иерусалиме: 9 Иерусалиме, граде святый, накажет тя за дела сынов твоих и паки помилует сыны праведных: 10 исповедайя Господеви благо и благослови Царя веков, да паки скиния Его созиждется в тебе с радостию, и да возвеселит в тебе плененныя, и да возлюбит в тебе бедныя во вся роды века: 11 языцы мнози отдалеча приидут ко имени Господа Бога, дары в руках имуще и дары Царю Небесе, родове родов восхвалят тя и дадут радование: 12 прокляти вси ненавидящии тя, благословени будут вси любящии тя во век: 13 радуйся и веселися о сынех праведных, зане соберутся и возблагословят Господа праведных: 14 о, блажени любящии тя, возрадуются о мире твоем: блажени, елицы скорвеша о всех наказаниих твоих, зане о тебе возрадуются, видяще всю славу твою, и возвеселятся во век: 15 душа моя да благословит Бога Царя великаго, 16 яко наздан будет Иерусалим сапфиром и смарагдом и каменем честным, стены твоя и столпи и забрала златом чистым, 17 и стогны Иерусалимския вириллом и анфраксом и камением от Суфира утелются, 18 и рекут вся стогны его: аллилуиа и восхвалят, глаголюще: благословен Бог, Иже вознесе во вся веки.